రామగుండం, సెప్టెంబర్ 8 (నేటి ప్రజా తెలంగాణ): సైబర్ మోసాల బారినపడిన బాధితులకు పోలీసుశాఖ అండగా ఉంటుందని, మోసపోయి కోల్పోయిన నగదును వీలైనంత త్వరగా తిరిగి రాబట్టడమే లక్ష్యంగా పనిచేస్తున్నామని రామగుండం పోలీస్ కమిషనర్ అంబర్ కిషోర్ ఝా తెలిపారు.రామగుండం పోలీస్ కమిషనరేట్ కార్యాలయంలో కమిషనరేట్ పరిధిలోని సైబర్ వారియర్స్తో నిర్వహించిన సమీక్ష సమావేశంలో పోలీస్ కమిషనర్ అంబర్ కిషోర్ ఝా, తెలంగాణ సైబర్ భద్రతా విభాగం పోలీస్ సూపరింటెండెంట్ సాయి శ్రీ పాల్గొన్నారు.ఈ సందర్భంగా సైబర్ భద్రతా విభాగం పోలీస్ సూపరింటెండెంట్ మాట్లాడుతూ సైబర్ నేరాలు రోజురోజుకు పెరుగుతున్న నేపథ్యంలో ప్రతి పోలీస్ స్టేషన్లో విధులు నిర్వహిస్తున్న సైబర్ వారియర్స్ తమ పరిధిలోని సైబర్ నేరాలపై ప్రత్యేక దృష్టి సారించాలని సూచించారు. నేరాల స్వభావం, నేరస్తుల కార్యకలాపాలు, అనుమానాస్పద వ్యక్తులు, ముఠాలకు సంబంధించిన సమాచారాన్ని సేకరించి సంబంధిత అధికారులకు ఎప్పటికప్పుడు అందించాలని తెలిపారు.వినాయక చవితి సందర్భంగా ఏర్పాటు చేసే ప్రతి గణేష్ మండపంలో తెలంగాణ సైబర్ భద్రతా విభాగం విడుదల చేసిన సైబర్ అవగాహన పోస్టర్లను తప్పనిసరిగా ప్రదర్శించాలని సూచించారు. ప్రజలకు సైబర్ నేరాలపై విస్తృత అవగాహన కల్పించేందుకు పెద్ద సంఖ్యలో అవగాహన కార్యక్రమాలు నిర్వహించాలని తెలిపారు.సైబర్ నేరాల నివారణ, దర్యాప్తు, తాజా నేర పద్ధతులపై సైబర్ వారియర్స్ తమ నైపుణ్యాలను పెంపొందించుకోవాలని సూచించారు. ఇందుకోసం అందుబాటులో ఉన్న శిక్షణ కార్యక్రమాలను ప్రతి ఒక్కరూ తప్పనిసరిగా వినియోగించుకోవాలని తెలిపారు. వివిధ ఫిర్యాదులు, కేసులకు సంబంధించిన నమోదు వ్యవస్థల్లో ఎలాంటి పెండింగ్ లేకుండా ఎప్పటికప్పుడు పరిశీలించి తక్షణ చర్యలు చేపట్టాలని ఆదేశించారు.ఈ సందర్భంగా పోలీస్ కమిషనర్ అంబర్ కిషోర్ ఝా మాట్లాడుతూ సైబర్ నేరాల బాధితుల ఫిర్యాదులపై వెంటనే స్పందించి కేసులు నమోదు చేయాలని ఆదేశించారు. ప్రజలను సైబర్ నేరాల నుంచి రక్షించడంలో సైబర్ వారియర్స్ పాత్ర అత్యంత కీలకమని, తక్షణ స్పందన చేసే తొలి స్థాయి సిబ్బందిగా అవసరమైన నైపుణ్యాలను పెంపొందించుకోవాలని సూచించారు.ప్రత్యేక శిక్షణ అవసరమైతే ముందుకు రావాలని, అవసరమైన శిక్షణ, ప్రోత్సాహం, పూర్తి సహకారం అందించేందుకు పోలీసుశాఖ సిద్ధంగా ఉందని తెలిపారు. ప్రధాన విధులపై దృష్టి సారించేలా అనవసరమైన పనిభారం, అంతరాయాలు లేకుండా చర్యలు తీసుకుంటామని పేర్కొన్నారు. సైబర్ నేరాలపై సమర్థవంతంగా పోరాడుతూ ప్రజలకు మెరుగైన సేవలు అందించాలని సూచించారు.సైబర్ నేరాలకు సంబంధించిన నిందితులు, బాధితుల ఖాతాల వివరాలు, లావాదేవీలకు సంబంధించిన అనుసంధానాలను కచ్చితంగా నమోదు చేయాలని ఆదేశించారు. బ్యాంకు, న్యాయస్థాన అధికారులతో సమన్వయంతో పనిచేసి త్వరగా అవసరమైన ఉత్తర్వులు వచ్చేలా కృషి చేయాలని సూచించారు.ఈ కార్యక్రమంలో తెలంగాణ సైబర్ భద్రతా విభాగం పోలీస్ సూపరింటెండెంట్ సాయి శ్రీ, సైబర్ నేరాల పోలీస్ స్టేషన్ డీఎస్పీ వెంకట రంగా రెడ్డి, రాణా ప్రతాప్, పోలీస్ కమిషనర్ సైబర్ నేరాల విభాగం ఇన్స్పెక్టర్ శ్రీనివాస్, మారుతి, క్రాంతి, ఉప ఇన్స్పెక్టర్లు, సీసీ సందీప్, సిబ్బంది పాల్గొన్నారు.
