మంచిర్యాల, జూలై 29:మంచిర్యాల జిల్లాలో హెచ్ఐవీ/ఎయిడ్స్ నివారణ, నియంత్రణ చర్యలను మరింత వేగవంతం చేయాలని జిల్లా కలెక్టర్ కుమార్ దీపక్ ఆదేశించారు. జిల్లా ఎయిడ్స్ నివారణ, నియంత్రణ కమిటీ సమీక్ష సమావేశంలో ఆయన అధ్యక్షత వహించి మాట్లాడారు. హెచ్ఐవీ నిర్ధారణ పరీక్షలను జిల్లా వ్యాప్తంగా విస్తృతంగా నిర్వహించి, నిర్దేశించిన లక్ష్యాలను 2026 డిసెంబర్ 1 నాటికి పూర్తిచేయాలని సంబంధిత శాఖలను ఆదేశించారు.జిల్లాలో ఇంకా చికిత్స పరిధిలోకి రాని హెచ్ఐవీ బాధితులను గుర్తించేందుకు ప్రత్యేక కార్యాచరణ చేపట్టాలని సూచించారు. గ్రామీణ, పట్టణ ప్రాంతాల్లో లక్ష్యిత స్క్రీనింగ్ శిబిరాలు నిర్వహించి, ప్రతి అర్హ వ్యక్తికి పరీక్షలు అందేలా చర్యలు తీసుకోవాలని పేర్కొన్నారు.స్వచ్ఛంద పరీక్షలను ప్రోత్సహించేలా ప్రభుత్వ కార్యాలయాలు, ప్రజలు అధికంగా వచ్చే ప్రాంతాల్లో స్వీయ ప్రమాద అంచనా క్యూఆర్ కోడ్లను ఏర్పాటు చేయాలని నిర్ణయించారు. వాటి ద్వారా ప్రజలు సమీపంలోని కౌన్సెలింగ్, పరీక్ష కేంద్రాలను సులభంగా చేరుకునే అవకాశం కల్పించనున్నట్లు తెలిపారు.స్వయం సహాయక సంఘాల సభ్యులు, మున్సిపల్ కార్మికులు, అధిక ప్రమాదం ఉన్న వర్గాల కోసం ప్రత్యేక ఆరోగ్య, హెచ్ఐవీ స్క్రీనింగ్ శిబిరాలు నిర్వహించాలని సమావేశంలో నిర్ణయించారు. మారుమూల ప్రాంతాలకు వైద్య సేవలు మరింత చేరువయ్యేలా చెన్నూరులో కొత్త కౌన్సెలింగ్, పరీక్ష కేంద్రం ఏర్పాటు అవసరాన్ని జిల్లా వైద్య ఆరోగ్యశాఖ అధికారి డాక్టర్ నరేందర్ రాథోడ్ వివరించారు.హెచ్ఐవీ బాధితులకు సామాజిక భద్రత, సంక్షేమ పథకాల అమలుపై ప్రత్యేక దృష్టి సారించాలని కలెక్టర్ సూచించారు. అర్హులైన లబ్ధిదారులకు రేషన్, గృహం, ఉపాధి, రుణ సదుపాయాలు త్వరితగతిన అందేలా సంబంధిత శాఖలు చర్యలు తీసుకోవాలని ఆదేశించారు. ఈ కార్యక్రమంలో అదనపు కలెక్టర్ చంద్రయ్య, జిల్లా వైద్య ఆరోగ్యశాఖ అధికారి డాక్టర్ నరేందర్ రాథోడ్, జిల్లా మాస్ మీడియా అధికారి బుక్క వెంకటేశ్వర్, జిల్లా ఎయిడ్స్ నియంత్రణ విభాగం అధికారులు, వివిధ శాఖల అధికారులు, వైద్య నిపుణులు, స్వచ్ఛంద సంస్థల ప్రతినిధులు, కమ్యూనిటీ సభ్యులు తదితరులు పాల్గొన్నారు.
